Prokuroria Zvicerane heton katër xhihadistë

Prokuroria Federale mund t`ia ndalojë udhëtimin dikujt vetëm kur atij i dëshmohet se është duke mbështetur një organizatë terroriste financiarisht ose me mjete tjera.

Prokurori Federal i Zvicrës, Michael Lauber ka bërë të ditur se aktualisht nga Prokuroria që udhëheq ai janë duke u hetuar katër persona të dyshuar për terrorizëm islamik. “Në këto raste jemi duke zhvilluar hetime lidhur me dyshimin për mbështetje të një organizate kriminale dhe përkrahje financiare të një grupi terrorist” ka thënë Lauber në një intervistë dhënë gazetës “SonntagsZeitung”.

Prokuroria Federale së bashku me zyrat për migracion, shërbimin inteligjent dhe me policinë janë shumë vigjilente, ka thënë ai. Rrezikshmëria e secilit person duhet të vlerësohet veç e veç. Por, ka shtuar Lauber, prokuroria nuk mban ndonjë listë të zezë të xhihadistëve.

Prokuroria Federale mund t`ia ndalojë udhëtimin dikujt vetëm kur atij i dëshmohet se është duke mbështetur një organizatë terroriste  financiarisht ose me mjete tjera. Por, ka shtuar Lauber, edhe në raste të tilla personat në fjalë nuk mund të mbahen gjatë në burg.

Prokurori Federal më tutje është treguar i kënaqur me faktin se Gjykata Federale Penale, në bazë të padisë së prokurorisë federale në muajin maj ka dënuar dy qytetarë të Bazelit, të cilët kanë përhapur propagandë terroriste. Kjo propagandë me të cilën bëhet përpjekje për rekrutimin e luftëtarëve është e rrezikshme, ka thënë ai.

Qeveria e vendit në qershor ka cituar shërbimin informativ  federal (NDB) sipas të cilit në zonat e konflikteve si në Siri e gjetiu rreth 40 persona nga Zvicra janë pjesë e xhihadit. Personave në fjalë që kthehen në Zvicër i pret ndjekja penale.