Punëdhënësit dhe kantonet duan më shumë ekspertë nga vendet e treta

Fjala është për vendimin e qeverisë për rritjen e kontingjentit të ekspertëve nga vendet e treta nga 6500 në 7500. Si punëdhënësit ashtu dhe kantonet do të kishin dëshiruar që ky numër të ishte edhe më i madh

Foto ilustrim

Punëdhënësit zviceranë (pronarët e firmave) ashtu si dhe kantonet e përshëndesin në parim vendimin që dje mori Këshilli Federal për shtimin e kuotave të specialistëve nga vendet e treta që do të lejohen të vijnë në Zvicër për të punuar. Fjala është për vendimin e qeverisë për rritjen e këtij kontingjenti nga 6500 në 7500.

Por si punëdhënësit ashtu dhe kantonet do të kishin dëshiruar që ky numër të ishte edhe më i madh. Federata e Punëdhënësve të Zvicrës ka deklaruar se ndërmarrjet zvicerane kanë nevojë për fuqi punëtore me kualifikime të larta nga vendet jashtë BE-së dhe EFTA-s.

E kënaqur me vendimin e ri është shprehur në parim edhe Konferenca e drejtorëve kantonalë të ekonomisë. Por sipas tyre, fakti se kontingjentet shtesë i janë lënë federatës dhe jo kantoneve, e shton ngarkesën administrative. Por, sa kohë që kantonet kanë të drejtë të kërkojnë plotësimin nga këto kontingjente, kjo paraqet një zbutje të mirëseardhur të gjendjes.