Qeveria e Kosovës e ka mirëpritur letrën e ligjvënësve të vendeve të Evropës

Alicia Kearns, FB

Qeveria e Kosovës e ka mirëpritur letrën që ligjvënësit e vendeve të Evropës ua kanë nisur SHBA-së, BE-së, Mbretërisë së Bashkuar, e ku kanë kërkuar qasje më të ekuilibër dhe proporcionale në marrëdhëniet me Kosovën e Serbinë.

Zëdhënësi i Qeverisë, Përparim Kryeziu tha se e mirëpresin letrën dhe i falënderojnë politikanët ndërkombëtarë për interesimin e tyre për Kosovën.

“Ne e mirëpresim letrën në fjalë dhe e falënderojmë kryetaren e Komisionit Parlamentar për Punë të Jashtme të Mbretërisë së Bashkuar, Alicia Kearns, senatorin Bob Menendez, kongresistët amerikanë, Torres dhe Titus, kryetarin e komisionit për Punë të Jashtme të Bundestagut gjerman, Michael Roth dhe gjithsecilin prej deputetëve dhe kryetarëve të komisioneve parlamentare për Politikë të Jashtme të vendeve mike, përfshirë atë të Ukrainës, për interesimin e tyre mbi Kosovën, mbështetjen ndaj saj, por edhe angazhim për të vënë në pah në këtë letër shkaqet dhe shkaktarët e situatës në veri të vendit tone”, tha Kryeziu për Telegrafin, përcjell albinfo.ch.