Reagimi i Listës serbe pas konferencës së kryeministrit Kurti

Keystone EPA/GEORGI LICOVSKI

Lista serbe, partia kryesore e serbëve në Kosovë, ka reaguar pas konferencës së sotme të kryeministrit të Kosovës Albin Kurti, lidhur me takimin e 14 shtatorit në Bruksel.

Sipas deklaratës të publikuar në rrjete sociale, Kurti po mban qëndrim antiserb dhe po vepron kundër popullit serb në Kosovë, teksa thuhet se vendimi i kësaj partie dhe i të gjithë qytetarëve për t’u larguar nga institucionet e Kosovës në veri të vendit është marrë në mënyrë të pavarur, përcjell albinfo.ch.

Lista serbe ka deklaruar se Kurti nuk dëshiron ta shtensionojë situatën, por t’i rrisë tensionet dhe ta kërcënojë paqen.

“Një mori të pavërteta të thëna në Prishtinë nga Albin Kurti nuk mund ta fshehin karakterin antiserb të regjimit të tij. Të gjitha gënjeshtrat e Albin Kurtit nuk mund ta errësojnë të vërtetën për të cilën janë të vetëdijshëm të gjithë qytetarët tanë që vuajnë çdo ditë shtypjen e tij, dhe për atë që janë gjithnjë e më të vetëdijshëm nga përfaqësuesit e bashkësisë ndërkombëtare, anëtarët e të cilit në terren vërejnë çdo ditë se Kurti po e flet një gjë dhe po e bën një tjetër. Ai flet për demokraci dhe shtet ligjor dhe zbaton autokracinë dhe nëpërkëmbjen e të gjitha akteve ligjore”, thuhet në deklaratën e Listës serbe.