Rënie e mprehtë e turistëve zviceranë në SHBA

Bie numri i turistëve zviceranë në SHBA

Referuar të dhënave nga agjencitë zvicerane të udhëtimit, thuhet se ka rënie të kërkesës për shkak të tensioneve politike dhe tregtare midis SHBA-së dhe BE-së, duke ndikuar pikërisht në flukset turistike evropiane, transmeton albinfo.ch.

Edhe statistikat zyrtare amerikane tregojnë një rënie të mprehtë të turistëve që mbërrijnë në Shtetet e Bashkuara, me një rënie prej rreth një çerek krahasuar me një vit më parë nga Zvicra.

Edhe vende të tjera evropiane, përfshirë Austrinë, Gjermaninë dhe Spanjën, shfaqin një tendencë të ngjashme. Disa agjenci turistike zvicerane po flasin për një kolaps të vërtetë të kërkesës.

Travelpoint në Brunnen regjistroi një rënie prej 64% në periudhën nëntor–prill. Për Adrian Müllerin, kreun e agjencisë, arsyeja kryesore janë politikat e administratës Trump, të cilat krijojnë pasiguri tek udhëtarët. “Ne kemi klientë që kanë frikë se nuk do të mund të hyjnë në Shtetet e Bashkuara apo edhe të arrestohen pas mbërritjes, por nuk është kështu,” thotë Müller. Për të, viti 2025 është tashmë i komprometuar.

---