Rifat Jashari falënderon popullin shqiptar për ndihmën e dhënë

Për vëllain e komandantit legjendar të UÇK-së, lufta e Kosovës nuk do të ishte e mundur pa ndihmën e shqiptarëve në anën tjetër të kufirit

Në Tiranë është përkujtuar rënia e Adem Jasharit e familjes së tij dhe epopesë së Ushtrisë Çlirimtare të Kosovës.

Për vëllain e komandantit legjendar të UÇK-së, lufta e Kosovës nuk do të ishte e mundur pa ndihmën e shqiptarëve në anën tjetër të kufirit.

“E falënderoj mbarë popullin shqiptar të Shqipërisë për pritjen e respektin gjatë asaj periudhe të luftës në Kosovë. I falënderoj të gjithë për kontributin edhe përpara luftës, edhe gjatë luftës, edhe pas luftës”, ka deklaruar Rifat Jashari, përcjell albinfo.ch.

Ajo çfarë bëri UÇK-ja për Kosovën shihet edhe sot nga politikanët e diplomatët si një udhërrëfyes për të ardhmen e shtetit 10-vjeçar.

“Është frymëzimi ynë. Mbi të gjitha është busulla jonë në rrugëtimin e konsolidimit të shtetit tonë në planin e brendshëm dhe ndërkombëtar”, theksoi Sylë Ukshini, ambasador i Kosovës në Shqipëri.

Për Pandeli Majkon, ish-kryeministër i asaj kohe që menaxhoi një situatë mjaft të vështirë, ajo çfarë Jasharët dhe UÇK-ja kanë lënë pas është një mesazh shumë i rëndësishëm për brezat e së ardhmes.

“Shpesh liria ka peshën e heshtjes së të rënëve. Kemi vetëm një detyrë në të tilla raste, për të transmetuar tek ata që vijnë më pas mesazhin e burrave dhe grave, të cilët në ditët e vështira të kombit treguan veten”, u shpreh Majko, tani ministër i Diasporës në Shqipëri.