Rita Ora, për herë të parë me “Headlineshow” në Zvicër

Me Rita Orën vjen "një ndër pop-këngëtaret më të zjarrta të të tashmes", në shoun e parë në Zvicër ku ajo nuk është shoqëruese por ka vendin kryesor

Në festivalin ndërkombëtar të muzikës bashkëkohore “Blue Balls” që mbahet në muajin korrik në Luzern të Zvicrës, prania e këngëtares me rrënjë kosovare Rita Ora konsiderohet si kulminacion i këtij organizimi.

“Do të ketë në këtë festival këngëtarë nga Skandinavia, soul gjerman, rok`n`Roll britanik, folk anglez dhe një pushtuese kosovare e hitparadave”, thuhet veç tjerash në komunikatën e organizatorëve, më shumë se dy muaj para aktivitetit të rëndësishëm muzikor. Gjithsesi, do të ketë edhe emra të tjerë por ata lihen si befasi.

Me Rita Orën vjen “një ndër pop-këngëtaret më të zjarrta të të tashmes”, në shoun e parë në Zvicër ku ajo nuk është shoqëruese e ndonjë bendi apo këngëtari por ka vendin kryesor, në “sallën e madhe KKL të Luzernit, të cilën do ta nderojë me praninë e saj”. Ajo do të paraqitet më 23 korrik, në festivalin që rrjedh nga 18 deri më 24 korrik.

Shitja e biletave për festivalin “Blue Balls” ka filluar më 24 mars.