Rizvanolli: Mërgata, ndër kontribuesit kryesorë në Kosovë

Në një postim në Facebook, Rizvanolli ka thënë se është nënshkruar një memorandum bashkëpunimi dhe ka filluar puna me Shoqatën e Inxhinierëve të Zvicrës në fushat e energjisë së ripërtërishme.

Ministrja e Ekonomisë, Artane Rizvanolli, ka vlerësuar rolin e mërgatës shqiptare, duke thënë se ekspertiza dhe atdhedashuria e mërgatës kanë qenë e vazhdojnë të jenë ndër kontribuesit kryesorë ndaj zhvillimit ekonomik e shoqëror të Kosovës.

Në një postim në Facebook, Rizvanolli ka thënë se është nënshkruar një memorandum bashkëpunimi dhe ka filluar puna me Shoqatën e Inxhinierëve të Zvicrës në fushat e energjisë së ripërtërishme, raporton Albinfo.ch.

Më poshtë postimi i plotë i ministres Rizvanolli:

Më pak se dy muaj më parë u takuam në Zvicër dhe qysh sot nënshkruam një memorandum bashkëpunimi dhe filluam punën me Shoqatën e Inxhinierëve të Zvicrës (AES) në fushat e energjisë së ripërtërishme, trajnimit e aftësimit profesional dual, minierave, riciklimit të mbeturinave, infrastrukturës energjetike, si dhe transportit hekurudhor.

Ekspertiza e atdhedashuria e mërgatës kanë qenë e vazhdojnë të jenë ndër kontribuesit kryesorë ndaj zhvillimit ekonomik e shoqëror të vendit tonë. Jam e lumtur që sot filluam një bashkëpunim të ngushtë me ekspertë të aftë e mbi të gjitha të dedikuar për t’i dhënë kontributin e tyre profesional Republikës së Kosovës.

Është kënaqësi që në takimin tonë të punës u bashkëngjitën edhe Zv. Ministrja e Punëve të Jashtme dhe Diasporës, Liza Gashi, përfaqësues të kabineteve të Ministrave Nagavci e Aliu, si dhe përfaqësues të menaxhmentit të lartë të Trepçës, Infrakosit, Trainkosit e Shërbimit Gjeologjik të Kosovës.

Shoqata e Inxhinierëve të Zvicrës gjatë qëndrimit të tyre në Kosovë do të vizitojnë të tri këto ndërmarrje për të parë nga afër punën e sfidat e tyre.

Jam plotësisht e bindur që rezultatet e prekshme nga ky bashkëpunim do t’i shohim shumë shpejt.

Faleminderit Shoqata e Inxhinierëve të Zvicrës!

---