Rregulla të njëjta nëpër dasma edhe për mërgimtarët

Njeriu i parë në policinë rajonale në Gjilan, Elmina Mahmuti, thotë se policia është përgatitur dhe është bërë gati për ardhjen e mërgimtarëve.

Mërgimtarët do të ndihmohen në çdo aspekt, por rregullat nëpër dasma e ahengje janë njësoj për të gjithë.
“Edhe pse ka një vetëdijesim të qytetarëve rreth përdorimit të armëve nëpër ahengje, megjithatë ne ende jemi të shqetësuar dhe kërkojmë nga çdo qytetar apo mërgimtar që t`u përmbahet udhëzimeve tona, sepse askush nuk do të tolerohet”, thotë numri një i policisë në Gjilan.

Mahmuti tha se ardhja e mërgimtarëve ka ngritur edhe nivelin e policisë për t’i pritur ata sa më mirë që është e mundshme.

“Ne po bëhemi gati për të pritur fluksin e mërgimtarëve. Statistikat flasin se me ardhjen e tyre rriten edhe aksidentet, gjuajtjet me armë në ahengje e dasma. Përkundër respektit, ne jemi të detyruar të zbatojmë ligjin dhe nuk do të ketë tolerime për askënd”, shprehet Mahmuti.

Mahmuti tha se këtë vit problem mbesin menaxhimi i parkingjeve dhe rrugëve të vjetëruara.
“Parkingjet janë të pakta, derisa rrugët e vjetëruara e vështirësojnë qarkullimin normal të vozitësve”, thotë ajo për rajonipress.

Mahmuti shpreh edhe një shqetësim tjetër që lidhet me sigurinë e qytetarëve.
“Sivjet kemi rritje të aksidenteve me fatalitet dhe kjo është tepër brengosëse”, tha Mahmuti.

Njeriu i parë në policinë rajonale në Gjilan ka edhe një falënderim për qytetarët.
“Vërtet pa ndihmën e qytetarëve vështirë është që të ruhet stabiliteti dhe siguria në të gjitha aspektet. Janë pikërisht qytetarët që duhet falënderuar për këtë arritje”, tha Mahmuti.