Rriten çmimet e transportit publik në Zvicër nga dhjetori 2026

Çmimet e transportit publik në Zvicër do të rriten sërish në fund të vitit 2026, tre vite pas rritjes së fundit. Këshilli strategjik i Aleancës Swisspass ka vendosur për një rritje mesatare prej 3.9%, duke u bazuar në situatën ekonomike dhe nevojën për investime për të përballuar kërkesën në rritje.

Sipas përfaqësuesve të sektorit, inflacioni ka vazhduar të rritet që nga fundi i vitit 2023, ndërsa kostot për materiale dhe personel janë shtuar ndjeshëm. Po ashtu, çmimet e energjisë mbeten të larta.

Në të njëjtën kohë, kërkesa për transport publik është në rritje, çka kërkon investime të reja. Kompanitë e transportit nuk mund t’i përballojnë më këto kosto vetëm përmes efikasitetit të brendshëm, theksohet nga Aleanca Swisspass.1

Bileta vjetore kalon mbi 4000 franga

Rritja e çmimeve do të zbatohet në mënyrë të diferencuar. Ofertat për fëmijë, të rinj dhe familje do të mbeten të pandryshuara ose do të pësojnë vetëm rritje minimale. Ndërkohë, çmimi i abonimit të përgjithshëm vjetor do të rritet më shumë se ai i biletave të vetme, ndërsa abonimi me gjysmë çmimi do të rritet me 5 franga, transmeton albinfo.ch.

Bonusi për paketat “Half Fare PLUS” do të mbetet i pandryshuar. Ndryshime do të ketë edhe për biletat e biçikletave dhe të qenve. Detajet e plota të çmimeve pritet të publikohen në pranverën e vitit 2026.

Çmimet e reja do të hyjnë në fuqi me ndryshimin e orarit në dhjetor 2026, ndërsa rrjetet rajonale do të vendosin vetë për tarifat e tyre.

 

Rregullatori i çmimeve nuk ishte i informuar

Rrjetet rajonale të transportit vendosin në mënyrë të pavarur për ndryshimet e çmimeve. Aleanca Swisspass pritet të bëjë një njoftim të plotë rreth muajit qershor. Vonesa lidhet me afatin 30-ditor për ankesa që ka rregullatori i çmimeve.

 

Nga ana tjetër, rregullatori i çmimeve Stefan Meierhans nuk ishte në dijeni për planet konkrete të sektorit dhe ka bërë të ditur se do të shqyrtojë vendimin sipas mandatit ligjor.

Kritika ndaj rritjes së çmimeve

Shoqata për Transport dhe Mjedis (ATE) ka reaguar ashpër ndaj kësaj rritjeje, duke paralajmëruar se mund të dëmtohet progresi i arritur në rritjen e numrit të udhëtarëve. Sipas saj, masat e kursimit të miratuara së fundmi po reflektohen tashmë në shpenzimet e qytetarëve.

 

Investimet dhe sfidat financiare

 

Përfaqësuesit e sektorit pranojnë se rritja e çmimeve është çështje e ndjeshme për qytetarët, por e konsiderojnë të domosdoshme për të garantuar cilësinë dhe zhvillimin afatgjatë të transportit publik.

Ata theksojnë se vendimet politike kanë ndikuar negativisht në financa, përfshirë heqjen e rimbursimit të taksës mbi karburantet nga viti 2027 dhe kufizimet në financimin e transportit rajonal.

Megjithatë, transporti publik do të vazhdojë investimet në mjete moderne, infrastrukturë dhe përmirësimin e shërbimeve. Mes risive përfshihet zgjerimi i linjave, shërbimet më të shpeshta dhe një rrjet i ri natën gjatë fundjavave, si dhe zgjerimi më i madh i shërbimeve në veriperëndim të Zvicrës në 20 vitet e fundit.

---