Rusia anulon shtrirjen e gazsjellësit nëpër Ballkan

“Projekti është mbyllur. Kaq”, kështu ka thënë shefi ekzekutiv i “Gazpromit” Alexei Miller. Presidenti Vladimir Putin tha se projekti u anulua pas kundërshtimit të Bullgarisë

Kompania më e madhe ruse “Gazprom” ka anuluar projektin e ndërtimit të gazsjellësit jugor për furnizimin me gaz të Evropës jugore, pasi që Bullgaria nuk lejoi që gazi të shtrihet nëpër territorin e saj. Ky vendim erdhi pas përplasjeve ndërmjet federatës së Rusisë dhe Ukrainës.

“Projekti është mbyllur. Kaq”, kështu u ka thënë gazetarëve shefi ekzekutiv i Gazpromit Alexei Miller. Njoftimi pasoi deklaratën e presidentin rus Vladimir Putin, i cili tha se Moska do të heqë dorë nga ndërtimi i gazsjellësit, nëse Bashkimi Evropian është kundër tij.

Presidenti rus duke folur në Ankara, pas takimit me presidentin turk Recep Tayyip Erdogan, tha se në vend të gazsjellësit “Rrjedha e jugut”, Rusia dhe Turqia mund të ndërtojnë një qendër të gazit për Evropën Jugore.

Gazsjellësi 40 miliardë dollarësh është dashur të kalojë nëpër Detin e Zi në Bullgari dhe më tej në Greqi dhe Itali, ashtu si edhe në Serbi, Hungari dhe Austri. Por, edhe presidenti Putin, siç raportoi VOA, ka potencuar faktin se ky anulimi i projektit ka ardhur si pasojë e kundërshtimit të qeverisë bullgare.

Kundërshtimi i Sofjes zyrtare vjen pasi të gjitha shtet e Bashkimit Evropian dhe SHBA-të i vunë sanksione ekonomike Rusisë për shkak të konfliktit në Ukrainë. Madje thuhet se Evropa synon të zvogëlojë varësinë e saj nga gazi rus.

“Nëse Bullgaria është e privuar nga e mundësia për të vepruar si shtet sovran, atëherë le të kërkojë kompensimin e humbjeve nga Komisioni Evropian”, ka deklaruar Putin në Ankara. Ai iu referua qëndrimeve të Bashkimit Evropian se gazsjellësi jugor, nuk është në përputhje me ligjet e BE-së.