Sakrifica e Gjimshitit

Berat Gjimshiti për të mos humbur vendin në Kombëtaren shqiptare ka kaluar si huazim në Avellino të Serisë B

Mbrojtësi i Kombëtares shqiptare, Berat Gjimshiti është detyruar të largohet nga Atalanta sepse përndryshe do të rrezikonte seriozisht vendin e tij në radhët e kombëtares shqiptare, shkruan albinfo.ch.

Mbrojtësi i kuqezinjve ka treguar pas debutimit me Avellinon ndaj Trapanit se si shkuan gjërat derisa ai firmosi me skuadrën e Serisë B. “E ndjeva veten mirë, ndonëse isha vetëm prej pak ditësh me skuadrën. Ishte e rëndësishme që të mos pësonim gol dhe ia dolëm mbanë. Avellino është një skuadër me shumë të rinj, por edhe me futbollistë me nivel të lartë. Ka përzierjen e duhur”, tha ai për debutimin.

I pyetur nga gazetarët nëse kishte folur me Gianni De Biasin për transferimin te Avellino dhe nëse ia kishte këshilluar pikërisht trajneri i kuqezinjve, mbrojtësi tregoi situatën në të cilën ishte gjendur para se të bënte këtë zgjedhje.

“Me De Biasin jo, por e kam bërë me mndihmësin e tij, Tramezzani, i cili më ka thënë se duhej të gjeja një sistemim ku të luaja me më shumë vazhdimësi për të mos humbur Kombëtaren dhe se Avellino ishte qyteti i duhur. Ai e njeh trajnerin Toskano dhe më këshilloi të vija këtu.

Në Bergamo nuk do të kisha pasur mundësinë që të luaja dhe ja ku jam, i gatshëm për të dhënë kontributin tim. Pozicioni? Me Shqipërinë kam luajtur në ndeshjen e fundit për herë të parë si mbrojtës qendre, ndërsa edhe sot mendoj se gjërat shkuan mirë”, tha Gjimshiti para gazetarëve.