Schumacher tregon shenja jete

"Ai po bën përparime në rrugën drejt shërimit. Ne, së bashku me stafin e spitalit në Grenoble i qëndrojmë pranë në luftën e tij të rëndë", ka thënë menaxherja

Kanë kaluar tre muaj nga aksidenti në një vendskijim në Alpet e Francës, në të cilin ish asi i madh i automobilizmit, Michel Schumacher, nga lëndimet kishte rënë në gjendje kome.

Gjatë gjithë kësaj kohe, gjendjen e rekordmenit gjerman e ka ndjekur një interesim i jashtëzakonshëm medieve dhe herë pas here ka pasur edhe raportime të paverifikuara mbi “zgjimin” ose kthimin e vetëdijes së tij.

Por, sipas një deklarate për shtyp që ka dhënë sot menaxherja e tij, Sabine Kehm, Schumacher ka pasur “momente të vetëdijes dhe të zgjimit”, shkruan azonline.ch.

“Ai po bën përparime në rrugën drejt shërimit. Ne, së bashku me stafin e spitalit në Grenoble i qëndrojmë pranë në luftën e tij të gjatë dhe të rëndë dhe jemi optimistë” ka thënë Kehm duke shtuar se familja e Schumacher-it nuk dëshiron të japë më shumë hollësi për të sëmurin.