Shefi i UBS ka fituar 11.2 milionë franga

Gjithsej për menaxherët në krye të bankës UBS gjatë vitit 2014 janë paguar 80.1 milionë franga ose 2 milionë më pak se një vit më parë

Shefi i bankës UBS, Sergio Ermotti ka fituar gjatë vitit të kaluar 11.2 milionë franga. Por njeriu i parë i bankës më të madhe zvicerane nuk e ka marrë këtë shumë në emrin e pagës dhe as në para të gatshme.

Paga bazë e tij për vitin 2014 ka qenë “vetëm” 2.5 milionë franga ndërsa me kompensimin e shpenzimeve dhe me arkën pensionale kjo shumë ka shkuar në 2.8 milionë. Ndërkaq pjesa më e madhe e fitimit të llogaritur të tij vjen si bonus. Plot 8.4 milionë franga është bonusi i tij, të cilin ai do ta marrë më vonë dhe në formë të aksioneve. Nëse performanca e realizuar korrespondon me kërkesat, ai do të disponojë pastaj me letrat me vlerë në nivel të shifrës së përmendur.

Një vit më parë, në vitin 2013, një menaxher tjetër, Andrea Orcel, shef i Bankës investive të UBS-it kishte fituar më shumë se Ermotti, gjegjësisht 11.5 milionë franga.

Gjithsej për menaxherët në krye të bankës UBS gjatë vitit 2014 janë paguar 80.1 milionë franga ose 2 milionë më pak se një vit më parë.

Presidenti i Bordit Administrativ, Axel Weber në vitin 2014 kishte fituar 5.9 milionë, në krahasim me 6.1 milionë sa i kishte fituar në vitin 2013.

Në vitin 2014 banka UBS ka rritur fitimine pastër për 9% në 3.5 miliardë franga.