Shevchenko pret ndeshje të vështirë ndaj Kosovës

“Ata kanë lojtarë të shpejtë anësorë dhe do të provojnë kundërsulmet, pra ata janë shumë të rrezikshëm”, deklaroi Andriy Shevchenko

Trajneri i Ukrainës, Andriy Shevchenko, u shpreh se e ka analizuar si duhet Përfaqësuesen e Kosovës. Legjenda e futbollit ukrainas pret një ndeshje të mirë, pasi e kupton mirë faktin se Kosova është e interesuar për një rezultat pozitiv, shkruan albinfo.ch.

“Ata kanë lojtarë të shpejtë anësorë dhe do të provojnë kundërsulmet, pra ata janë shumë të rrezikshëm. Kosova dëshiron fitore sikurse ne, e gjitha kjo për shkak të situatës në grup dhe kjo është arsyeja pse pres një ndeshje të mirë. Kanë humbur 6:0, por secila ndeshje është e ndryshme. Ata kishin mundësitë e tyre për të kontrolluar ndeshjen kundër Kroacisë”, deklaroi legjenda e Milanit.

Ai ka shtuar se pret fitore ndaj Kosovës. “E njoh Kosovën, kanë ekip të mirë dhe sot pres një ndeshje të mirë. Pres fitore”, ka thënë Shevchenko.

Ndeshja Ukrainë-Kosovë do të zhvillohet sot në orën 18:00 në stadiumin “Marshal Jozef Pilsudski” në Krakov të Polonisë.