Shfaqje zvicerane-kosovare: “Love.State.Kosovo”

Të enjten, më 29 gusht jepet premiera e shfaqjes “Love.State.Kosovo” në kuadrin e Festivalit të teatrove “Zürcher Theater Spektakel” në Cyrih

“Ne, në Evropën Perëndimore interesohemi fare pak ose aspak për Kosovën”. Kështu mendojnë regjisoret dhe aktoret, zvicerania Beatrice Fleischlin dhe gjermania me qëndrim në Bazel, Antje Schup, të cilat për të sfiduar këtë gjendje kane udhëtuar në Kosovë dhe kanë realizuar një projekt teatror me temën e përjashtimit, diferencimit.

Secila me këndvështrimin qëllimisht naiv europerëdimor, ato kanë vëzhguar zhvillimet komplekse politike dhe sociale në krijesën e re shtetërore. Pastaj, përshtypjet e tyre, përjetimet dhe përvojat i kanë përpunuar artistikisht në performancën që e kanë realizuar së bashku me artistin e perfomancave Astrit Ismaili dhe valltarin Labinot Rexhepi, të dy nga Kosova.

Por, performanca “Love.State.Kosovo” nuk pasqyron vetëm këndvështrimet personale mbi Kosovën të katër artistëve. Ajo tematizon, me një “shkelje syri” vënien dhe kalimin e kufijve në kuadër të bashkëpunimit artistik.

Dy artistet, për të njohur më mirë realitetin kosovar kanë qëndruar disa ditë në Kosovë. Ato thonë se “janë dashuruar” në Kosovën. Njerëz të huaj atje tregoheshin spontanisht të gatshëm të na shoqëronin me makinë gjatë gjithë ditës nëpër regjion. Në vend të depresionit ne atje gjetëm energji dhe optimizëm. Në vend të grave të vjetra e të mbuluara me shami, ne pamë femra të reja “sexy”. Unë madje atje e ndjeja veten `underdressed` (e veshur më keq) n thotë Beatrice Fleischlin.  

Në këtë shfaqje flitet gjermanisht, anglisht, shqip, schweizerdeutsch me titrim në gjuhën gjermane.

Premiera do të jepet më 29 gusht në kuadrin e Festivalit të teatrove “Zurcher Theater Spektakel” në Rote Fabrik, Aktions Halle, Cyrih, duke filluar në orën 21.00

Dy reprizat jepen më 30 dhe 31 gusht në të njëjtën kohë dhe vend. ndërsa nga 18-25 tetor shfaqja jepet edhe në Bazel, respektivisht në “Kaserne”.