Shëndetësi

Shpenzimet në shëndetësi: Zvicra e para, Shqipëria e fundit

Në Evropë shpenzimet më të larta publike për shëndetin i kanë Zvicra, Franca, Gjermania dhe Suedia, përkatësisht me 12.3, 11.5, 11.3 dhe 11 për qind

Shqipëria renditet e fundit në Evropë dhe rajon për shpenzimet publike që akordon për sektorin e shëndetësisë në raport me PBB-në, madje më një diferencë shumë të thellë në raport me mesataren e vendeve të BE-së dhe dy herë më pak se rajoni.

Sipas të dhënave të Eurostat shpenzimet mesatare të vendeve të BE-së për sektorin e shëndetësisë arritën në 9.9 për qind të PBB në vitin 2017, teksa sipas të dhënave kombëtare në të njëjtin vit shpenzimet për shëndetësinë në raport me PBB ishin 2.8 për qind.

Të dhënat tregojnë se Shqipëria akordon shpenzime nga buxheti në raport me PBB 3.5 herë më pak se Evropa, tre herë më pak se Bosnja dhe dy herë më pak se rajoni, transmeton Monitor.

Shqipëria u rendit e fundit pas Rumanisë e cila më 2017 i kishte shpenzimet në sektorin e shëndetësisë sa 5.2 për qind e PBB-së, përcjell albinfo.ch.

Në Evropë shpenzimet më të larta publike për shëndetin i kanë Zvicra, Franca, Gjermania dhe Suedia, përkatësisht me 12.3, 11.5, 11.3 dhe 11 për qind.

Ndërsa shpenzimet më të ulta i kanë Shqipëria me 2.8 % të PBB-se, Rumania me 5.2% të PBB-së.