‘Shpërthejnë’ komentet kundër yjeve të Zvicrës

Tifozët kanë ‘shpërthyer’ në “Facebook” kundër tyre, duke i quajtur tradhtarë dhe duke i ofenduar në mënyra të ndryshme

Tifozët kosovarë kanë pritur me interesim të madh shpalljen e listës së Zvicrës për ndeshjen ndaj Portugalisë. Në këtë listë u konfirmua se Granit Xhaka, Valon Behrami dhe Shani Tarashaj do të luajnë, duke shuar shpresat se ata do t’i bashkohen Kosovës, shkruan albinfo.ch.

Shaqiri nuk do të luajë për shkak të lëndimit, por gjasat që t’i bashkohet Kosovës janë shumë minimale. Këtu përfundoi edhe ëndrra e tifozëve kosovarë që në ekip t’i kenë yjet shqiptarë.

Milot Rashica, Alban Meha, Herolind Shala, Sinan Bytyqi, Amir Rrahmani, Arbër Zeneli, Valon Berisha dhe Ardijan Ismajli vendosën t’i bashkohen Kosovës, por jo yjet shqiptarë.

Deri më tani nuk ka pasur ndonjë deklaratë të futbollistëve shqiptare, por reagimet në rrjetet sociale ishin të mëdha. Ata kanë ‘shpërthyer’ në “Facebook” kundër tyre, duke i quajtur tradhtarë dhe duke i ofenduar në mënyra të ndryshme.

Tifozë, analistë e gazetarë nuk kanë ngurruar të shkruajnë për këtë çështje të ndjeshme. “Jeni dhe gjithmonë do të mbeteni tradhtarë”, ka shkruar një tifoz. “Si mund të refuzoni vendin e juaj”, ka shkruar një tjetër. “Kosova kishte nevojë për ju. E ju ia kthyet shpinën”, shton një tjetër.

Reagimet janë të ndryshme, por në Kosovë shumica ishin kundër zgjedhjes së tyre. Tashmë yjet shqiptarë të Zvicrës vështirë se do të gëzojnë respektin në Kosovë siç e kishin më herët. Megjithatë, opinioni në Kosovë duhet të bëjë pak përpjekje për të kuptuar situatën e jashtëzakonshme në të cilën ndodhen djelmoshat: të lindur e rritur në Zvicër, ata të gjithë ngritjen e tyre si futbollistë ia detyrojnë Zvicrës. Në këtë kuptim, edhe përcaktimi i tyre për ose kundër Kosovës nuk është kaq i thjeshtë.