Shpëtim Shala bokson kundër suedezit Erik Skoglund

Boksieri pejan i cili banon në Vjenë të Austrisë tashmë gjendet në Suedi, ku para meçit, atje është takuar edhe me bashkatdhetarët tanë në Suedi të cilët i kanë shprehur mbështetje

Kanë mbetur vetëm edhe dy ditë nga dita kur boksieri shqiptar Shpëtim Shala do të ngjitet në ring për t’u përballur me boksierin suedez Erik Skoglund. Meçi ndërmjet dy boksierëve do të zhvillohet  të premten,  më 9 dhjetor në Nykoping të Suedisë, në vendbanimin e Skoglund dhe është i vlefshëm për titullin WBO International.

Boksieri pejan i cili banon në Vjenë të Austrisë tashmë gjendet në Suedi, ku para meçit, atje është takuar edhe me bashkatdhetarët tanë në Suedi të cilët i kanë shprehur mbështetje.

“Sot e patëm në program një stërvitje të lehtë para mediave, e vizituam Arenen Rosvala ku do të boksoj të premten si dhe i takova disa bashkatdhetarë që jetojnë në Nyköping të cilët i falënderoj për mirëpritjen”, ka thënë boksieri Shala, raporton “albinfo.ch”.

Boksieri suedez njihet për boksin e tij mjaftë cilësor. Ai ka 25 fitore në boksin profesionist, po aq sa ka edhe meçe të zhvilluara, ndërsa Shala prej 23 ndeshjeve ka një humbje dhe një barazim si dhe 21 fitore.