Shqipëria nuk po punon kundër Kosovës

Nga Kombëtarja shqiptare drejt Kosovës janë larguar Milot Rashica, Herolind Shala dhe Alban Meha, derisa Sinan Bytyqi la Austrinë për Kosovën

Paolo Tramezzani, krahu i djathtë i Gianni De Biasit, por ndërkohë edhe drejtor sportiv i Kombëtares shqiptare është i bindur se nuk do të ketë më asnjë largim nga Shqipëria drejt Kosovës. Ai respekton zgjedhjen e Milot Rashicës me shokë, ndërkohë kërkon që zyrtarët e federatës së Kosovës të mos shohin armiq te homologët e tyre në Shqipëri, shkruan albinfo.ch.

“Nuk kemi punuar asnjëherë kundër Kosovës apo ndonjë vendi tjetër. Kemi qenë shumë korrektë në këtë pikë”, thotë Tramezzani për mediat shqiptare. Ai zbulon gjithashtu edhe strategjinë e re për të gjitha ekipet përfaqësuese, teksa pohon se sistemi i lojës do të jetë sipas ekipit të parë dhe se mbrojtja do të jetë me katër futbollistë në të gjitha ekipet kuqezi.

Në fund, ai nuk e fsheh ëndrrën për t’u kualifikuar në Botëror, por thotë se skuadra jonë duhet të jetë e përulur, ashtu si në eliminatoret e Evropianit.