Shqipëria teston futbollistët shqiptarë në Zvicër

Mbi 160 futbollistë shqiptarë nga skuadrat zvicerane janë ftuar të marrin pjesë në seleksionimin e Federatës Shqiptare të Futbollit

Federata Shqiptare e Futbollit (FSHF) edhe një herë do të testojë futbollistët shqiptarë të cilët luajnë në Zvicër dhe janë të shumtë, raporton albinfo.ch.

Këtë e ka njoftuar përfaqësuesi i Shqipërisë për Zvicër, Sokol Dauti në rrjetin e tij social në “Facebook”.

“Si çdo vit edhe këtë vit Federata Shqiptare e Futbollit organizon seleksionim (provë-trening) me lojtarët shqiptarë që luajnë në Zvicër. Janë të thirrur të gjithë futbollistët shqiptarë që luajnë në këto ekipe zvicerane duke filluar nga FC Zurich, FC Basel, Grasshoppers Club, FC Luzern, FC Servette, FC Lausanne, FC St.Gallen, FC Winterthur, BSC Young Boys, FC Aarau, FC Thun, FC Lugano, FC Will, Xamax, SC Kriens, etj. Të gjithë lojtarët shqiptarë që luajnë në këto ekipe U15, U16, U17, U18, U19, të gjithë janë të thirrur me ftesë zyrtare nga Federata Shqiptare e Futbollit. Të ftuar janë mbi 160 futbollistë. Në seleksionim prezent do të jenë ish-sulmuesi i Kombëtares, Erjon Bogdani (trajner U19), Xhemal Mustadanagiq (trajner U17 ) dhe Dritan Babamusta nga Departamenti i Ekipeve Kombëtare.

Seleksionimi do të mbahet të shtunën”, ka shkruar ai.