Shtëpia e tifozëve në Francë

Zona e fansave që është një koncept i suksesshëm marketingu në futbollin modern, u inaugurua nga presidenti i Federatës Franceze të Futbollit, Armand Duka

Shtëpia kuqezi në Francë hapi dyert për të gjithë tifozët shqiptarë. Mbështetësit e Kombëtares Shqiptare tashmë kanë një qendër ku mund të takojnë idhujt e tyre, mund të blejnë produktet sportive zyrtare të skuadrës, por të përfitojnë edhe dhuratat e ideuara nga organizatorët, shkruan albinfo.ch.

Qindra shqiptarë që banojnë në zonat përreth, por edhe francezë vizituan zonën e fansave të ideuar sipas stilit modern. Një strukturë falë një investimi modern, brenda së cilës do të zhvillohen aktivitete të ndryshme gjatë gjithë periudhës së pjesëmarrjes së Shqipërisë në Euro 2016. Ishin lojtarët dhe trajneri Gianni De Biasi ata që vizituan të parët ambientet e zonës së fansave ku më pas qindra shqiptarë dhe francezë morën autografe dhe bënë fotografi me idhujt e tyre.

Zona e fansave që është një koncept i suksesshëm marketingu në futbollin modern, u inaugurua nga presidenti i Federatës Franceze të Futbollit, Armand Duka, i cili pasi falënderoi kryebashkiakun, Erven Leon, e sfidoi atë me fitoren e kuqezinjve ndaj bluve.

Trajneri De Biasi nga ana e tij falënderoi banorët e zonës për mikpritjen dhe theksoi se shpreson që Kombëtarja të qëndrojë sa më gjatë në Perros Guirec, duke shkuar se ndoshta do të ishte ideale që bashkë me Shqipërinë, në fazën tjetër të kualifikohej edhe Franca.