Shteti pranon dështimin në rastin e vrasjes së Adelinës

Kreu i qeverisë së Gjenevës, Charles Beer ka thënë: “Kantoni i Gjenevës ka dështuar t`u ofrojë mbrojtje punëtoreve dhe punëtorëve të tij"

Personi i dyshuar për vrasjen e terapeutes sociale Adeline që ka ndodhur në Gjenevë para pak javësh nuk ka pasur të drejtë që të lirohej nga burgu për të bërë terapinë sociale. Por atij i është lejuar pa pasur të drejtë ta bënte këtë, ditën kur Fabrice A., i dënuar dy herë për dhunim dhe vrasje, dyshohet ta ketë vrarë Adelinën. Ky zbulim ka krijuar shqetësim shtesë në lidhje me rastin që pati tronditur Zvicrën si autoritetet e Gjenevës ashtu dhe ato të burgut kanë shkelur procedurat kur e kanë lejuar një gjë të tillë.

Fajësinë  për dhënien e lejes që vrasësi të dalë i lirë nga burgu e ka pranuar kreu i qeverisë së Gjenevës, Charles Beer të mërkurën. “Kantoni i Gjenevës ka dështuar  t`u ofrojë mbrojtje punëtoreve dhe punëtorëve të tij”, ka thënë Beer në një konferencë shtypi të mbajtur të mërkurën, me ç`rast i ka kërkuar falje publike familjes së gruas së vrarë.

Një hetim administrativ i drejtuar nga ish ministri në qeverinë e Gjenevës, Bernard Ziegler ka treguar se para se t`i jepej leja eventuale për dalje të lirë nga burgu për të bërë terapinë,  duhej t`i ishte bërë atij një ekspertizë e veçantë, nga jashtë. Dhe, këtë nuk e ka bërë drejtoresha e burgut “La Pâquerette”.

Një ekspertizë psikiatrike e bërë në vitin 2011 kishte ardhur në përfundimin se i burgosuri, tashmë vrasësi i Adelinës, nuk duhet të lejohet të dalë nga burgu. Ekspertiza, e cila është në dosjen e Fabrice  E., tërhiqte vërejtjen për rrezikun që ai të kryente sërish një vepër të tillë kriminale.