Shtyhet regjistrimi i popullsisë në Kosovë

Qeveria e Kosovës ka shtyrë për dy muaj nisjen e regjistrimit të popullsisë, e sipas kryeministrit Albin Kurti, faji është tek Asociacioni i Komunave të Kosovës.

Në mbledhjen e Qeverisë është vendosur që nisja e këtij procesi të bëhet më 1 nëntor.

“Me mbështetjen e UNOPS-it do të ndërmerrnim hapat e parë për sigurim të prokurimit të pajisjeve të domosdoshme për procesin. Por duke respektuar Kushtetutën dhe ligjin për marrëveshjet ndërkombëtare, ne s’mund të trajtonim një bashkëpunim të tillë ndryshe veçse si marrëveshje ndërkombëtare, për dallim nga Qeveritë e kaluara që më 2011 për qëllim të regjistrimit të popullsisë, bashkëpunimin me një organizatë ndërkombëtare, të cilës ia transferuan miliona euro për qëllim prokurimi, e bënë me një memorandum të thjeshtë bashkëpunimi. Mënyra e tillë e bashkëpunimit e cenon shtetësinë e Kosovës. Një gjë e tillë me qeverinë tonë nuk bëhet”, ka thënë Kurti, përcjell albinfo.ch.

Sipas Kurtit, ky autoritet ka kryer me sukses obligimin, ndërsa ka fajësuar për “rezistencë” brenda Komisionit Qendror të regjistrimit nga Asociacioni i Komunave të Kosovës, shkruan koha.net.

“Edhe pse përgatitjet u bënë përkundër rezistencës të prodhuar edhe brenda Komisionit qendror të regjistrimit nga Asociacioni i Komunave të Kosovës, procesin nuk mund ta fillojmë para datës 1 nëntor 2023. Pra dy muaj më vonë për shkak të pamundësisë së Agjencisë së Statistikave të Kosovës që me vonesë të shkaktuara t’i planifikonte detajet”, ka thënë Kurti në arsyetimin para marrjes së vendimit, përcjell albinfo.ch.