Sonte në Bazel duele të forta të boksierëve shqiptarë

Shemsi Beqiri do ta ketë përballë holandezin William Diender. Kickboksieri shqiptar rikthehet pas 15 muajve pushimi dhe mbron titullin e kampionit të botës për të 12 –tën herë

Një ngjarje e madhe e “Supro Fight Nicht” do të zhvillohet sonte (12 mars) në Bazel të Zvicrës. Në këtë spektakël të kickboksit do të zhvillohen disa duele të mëdha të kickboksierve shqiptarë.

Kampioni i shumëfishtë botëror Shemsi Beqiri do ta ketë meçin kryesor. Ai gjatë këtij dueli përballë do ta ketë holandezin William Diender. Kickboksieri shqiptar rikthehet pas 15 muajve pushimi dhe do të luftojë për të mbrojtur titullin e kampionit të botës për të 12 –tën herë.

Një tjetër duel interesant do të jetë edhe para meçi i vëllait të Shemsiut, Hysni Beqirit. Ai për kundërshtar do ta ketë Marco Pique. Synimi i radhës për Hysniun do të jetë Glory.

Ndërkohë një tjetër shqiptar që sonte do të ngjitet në ring do të jetë Ridvan Vllasaliu. Boksieri nga Prishtina do të ndeshet me Armen Petrosyan. Meçi do të jetë i vlefshëm për titullin e kampionit të botës në versionin WFCA.

Petrosyan është kickboksier i njohur dhe ka eksperiencë më të madhe në këtë sport. Në anën tjetër Vllasaliu ka thënë për “albinfo.ch” se është i përgatitur maksimalisht dhe se ky është meçi më i rëndësishëm në karrierën e tij. Ai është shprehur i bindur që këtë titull do ta fitojë në Bazel dhe ta dërgoj në Kosovë.