Sot, 61 vjet nga lindja e Agim Ramadanit

Sot, të premten e 3 majit, janë bërë 61 vjet nga lindja e Heroit të Kosovës, Agim Ramadanit.

I njohur me nofkën “Katana”, Agim Ramadani ka lindur më 3 maj të vitit 1963 dhe ka vdekur më 11 prill të vitit 1999. Ramadani ishte njëri prej komandantëve më të shquar dhe më aktivë të Ushtrisë Çlirimtare të Kosovës si dhe komandant i Zonës së Koshares, transmeton albinfo.ch.

Gjatë luftës së fundit në Kosovë, ai zhvilloi operacione të suksesshme ushtarake kundër forcave serbe përreth kufirit Kosovë–Shqipëri dhe mori pjesë në Betejën e përgjakshme të Koshares e cila u zhvillua më 9 Prill të vitit 1999, ku edhe ishte komandant i Brigadës 138 deri në ditën e rënies heroike të tij. Pas përfundimit të luftës, ai u shpall Hero i Kosovës.

Si piktor organizoi ekspozita kolektive e personale në Kroaci, ndërsa ka punuar si ushtarak dhe në Zvicër ku jetoi si emigrant politik dhe me fillimin e luftës në Kroaci, ai e braktisi ish–Armatën Jugosllave ku punonte si oficer. Në vitin 1998 është pranuar si anëtar nderi në Akademinë Evropiane të Arteve.

Ndonëse e kishte të rregulluar statusin e emigrantit, Agim Ramadani në vitin 1998, u bashkua në radhët e Ushtrisë Çlirimtare të Kosovës, duke i lënë në Zvicër gruan dhe tre fëmijët e tij.

Agim Ramadani ishte njëri ndër hartuesit e planit për thyerjen e kufirit me Shqipërinë, teksa pas thyerjes së këtij kufiri, në pjesën e Kosovës, tek vendi i quajtur “Zharret”, ai ra dëshmor.