St.Gallen – Lugano: Ndeshje me shumë gola dhe me shumë shikues

Ndeshjet e javës së njëzetedytë të Kampionatit futbollistik të Super Ligës zvicerane edhe pse mbante mot i ftohtë i kanë përcjell afër dyzetmijë shikues.

Takimi  në stadiumin AFG Arena  ndërmjet  FC  ST. Gallen dhe FC Lugano, që ka përfunduar me rezultat baras  3 me 3 është ndjekur nga 10’814 spektatorë.

Të parët  në minutën e shtatë në epërsi 1 me 0 kanë  kaluar futbollistët e St.Gallenit me golin e shënuar nga Bunjaku.

Vetëm dhjetë minuta më vonë  vendasit e kanë  ngritur rezultatin në  2:0.

Avantazhi i hershëm sikur u  ka krijuar vetëkënaqësi  .  Vendasit  paksa lëshuan  ritmin e lojës,gjë të cilën e shfrytëzuan për mrekulli lojtarët mysafir të FC Lugano.  Vetëm katër minuta pa përfunduar pjesa e parë e lojës nëpërmjet Domen Cirnigojit, ata ngushtuan rezultatin në 2 me 1.

Pushimi prej pesëmbëdhjetë minutave sikur i këndelli  futbollistët e Luganos, të cilët nëpërmjet Sabbatinit në minutën e 56 barazuan rezultatin në 2 me 2.

Mbrojtja e FC St.Gallen e demoralizuar nga barazimi u tregua fare  e pakujdesshme  edhe në minutën e 62-të, kur Lugano del në epërsi  3 me 2.

Pas shumë përpjekjesh të pareshtura futbollistët e FC ST.Gallen në minutën e 80 nëpërmjet Danjel Aleksiq mposhtin portierin Valentini të Luganos dhe barazojnë rezultatin në 3 me 3.

Te mysafirët që po zhvillojnë luftë për të mbijetuar në grup me më të mirët vërehej dëshira  e flaktë për fitore.

Ata nëpërmjet rezervistit Donis organizojnë një rast të volitshëm për shënim por ndaj këtij lojtari starton ashpër mbrojtësi Roy Gelemi i FC. St. Gallen dhe gjyqtari kryesor i këtij takimi Paskal Erlachner tregon pikën e bardhë.

Ishte minuta e 83 e lojës e cilësuar edhe si fatale për Anastasios Donis ,sepse ai  e huq penaltinë. Sikur mysafirët të ishin më me shumë fat fare lehtë pikët nga ky takim  kanë mundur të shkojnë në Lugano , për të cilën sot luajtën me mjaft sukses  edhe Frederik Veseli dhe Ezgjan Alioski.

Skuarda e FC Vaduz  në luftë të vazhdueshme për t’i shpëtuar largimit nga Super Liga zvicerane falë  shënimit të Armando Sadikut në minutën e 52 në përballje me FC Grasshopper të Cyrihut nxori rezultatin e barabartë 1me1.

Ndërkaq  SGC YOUNG BOYS i Florent Hadërgjonajt  është kthyer me fitore nga Cyrihu.

Ai ka mundur në fushën e tij FC Zurich-in 0:1. Kjo humbje e ka destabilizuar edhe më tepër këtë skuadër e cila assesi  gjatë këtij Kampionati nuk po mund të gjejë veten.

Kurse SGC Young  Boys, pas kësaj fitoreje mund të futet  në luftë për vendin e dytë.

FC Basel 1893 që tani i llogaritur Kampion  i Zvicrës, pa e vënë veten shumë në siklet ka luajtur baras 1me 1 me FC Thun-in  nikoqir.

Këtë komoditet FC Baselit ia ka lejuar epërsia e krijuar prej 15 pikësh diferencë ndaj përcjellësit të tij FC Grasshopper të Cyrihut.

FC Sion me lojën e tij të bukur ka gëzuar rreth shtatëmijë  shikues të tij. Ai  ka gjunjëzuar FC Luzern-in e Jahmir Hykës dhe Hekuran Kryeziut, duke e mundur me rezultat bindës 3 me 1.

Në saje të kësaj fitoreje FC SION është ngjitur në pozitën e katërt të renditjes tabelore duke grumbulluar njëzetetetë  pikë.

ARIF EJUPI