Fëmijët, shumë më mirë “të armatosur” kundër koronës se sa të rriturit

Ndërkohë që as një e dhjeta e të rriturve të infektuar nuk shpëtojnë pa simptoma, tek 45 për qind e fëmijëve të infektuar nuk është vënë re asgjë

Fëmijët janë shumë “më të armatosur” kundër koronavirusit sesa të rriturit: Ata infektohen më rrallë, kanë simptoma më të lehta dhe mbrojtja e tyre imunitare, pasi të jenë infektuar, është më e qëndrueshme sesa ajo e të rriturve. Në familjet me një person të infektuar, mesatarisht infektohen një e treta e fëmijëve ndërsa sjhkalla e infektimit të të rriturve është 58 për qind, transmeton albinfo.ch.

Ndërkohë që as një e dhjeta e të rriturve të infektuar nuk shpëtojnë pa simptoma, tek 45 për qind e fëmijëve të infektuar nuk është vënë re asgjë.

Edhe të vegjlit që megjithatë kanë treguar simptoma, kanë vuajtur shumë më pak sesa të rriturit. Në rastet e sëmurjes së fëmijëve në moshën dymbëdhjetë vjeçare, ka ndodhur vetëm çrregullimi i ndjenjës së shijes. Nga ana tjetër, tek ata mbi moshën dymbëdhjetë vjeç janë konstatuar vetëm kollitje dhe ethe.

Një vit pas infektimit, fëmijët shfaqin nivele specifike më të larta dhe më të gjata të antitrupave sesa të rriturit – edhe pse kishin treguar pak ose aspak simptoma.

Këto zbulime janë prezantuar në një studim të realizuar nga spitalet universitare në Heidelberg, Tübingen, Ulm dhe Freiburg, përcjell albinfo.ch. Për studimin në fjalë, janë ekzaminuar 328 familje me të paktën një anëtar të familjes që vuante nga Covid-19. Gjithsej kanë marrë pjesë 548 fëmijë mes moshave 6 dhe 14 vjeçare dhe 717 të rritur.

---