Të gjithë kundër SVP/UDC-së për migracionin

Në komision ka pasur një front të qartë kundër iniciativës kundër migracionit masiv. Në fakt të gjithë anëtarët, përveç atyre të SVP-së, kanë votuar kundër

Me 18 vota kundër dhe me 7 pro, komisioni për politikë shtetërore i Dhomës Nacionale të Parlamentit të Zvicrës ka hedhur poshtë iniciativën e bërë nga SVP/UDC-së për „ndalimin e migracionit masiv“ në Zvicër.

Siç ka theksuar kryetari i komisionit, Ueli Leuenberger para medieve, sot në Bernë, në komision „ka pasur një front të qartë kundër iniciativës. Në fakt të gjithë anëtarët, përveç atyre të SVP-së, kanë votuar kundër. Sipas qëndrimit të komisionit, një Po për iniciativën do t`i shkaktonte dëme të konsiderueshme Zvicrës.

SVP/UDC me këtë iniciativë të dorëzuar para një viti kërkonte që numri i të huajve në Zvicër të kufizohet përmes kontigjenteve vjetore, ndërsa zviceranët të kenë përparësi në tregun e punës. Nëse kjo iniciativë do të pranohej, Zvicra do të detyrohej që brenda tri vitesh ta rinegocionte me BE-në marrëveshjen për lëvizjen e lirë.

Shumica në komision ashtu sikurse edhe Këshilli Federal, mendojnë se kjo do të ishte rrugë e gabuar. Marrëveshja për lëvizje të lirë me BE-në, sipas Leuenberger përbën një model të suksesshëm për Zvicrën. Me një po eventuale për iniciativën, Zvicra do të vetëpërjashtohej. Ajo do të mbetej kështu jashtë tregjeve më të rëndësishme dhe do të pësonte edhe zhvillimi i saj ekonomik.

Në rast të heqjes dorë nga marrëveshja për lëvizje të lirë, do të binte poshtë e gjithë pakoja e marrëveshjeve bilaterale me BE-në, ka shtuar Leuenberger.

Ai ka thënë se në komision është biseduar gjerësisht për problemet e migracionit. SP/PS dhe të Gjelbrit kanë kërkuar masa mbrojtëse si pagat minimale dhe marrëveshjet e përgjithshme. Ndërsa partitë e djathta janë fokusuar më shumë në luftimin e keqpërodrimeve. Ato janë shprehur po ashtu edhe për kufizimin e ndihmave sociale dhe të mundësive për bashkim familjar të të huajve në Zvicër.

Në përgjithësi, të majtët dhe të djathtët, me përjashtim të SVP-së, kanë qenë unikë në kundërshtimin e iniciativës së kësaj të fundit.