Tërmeti me fuqi 4 shkallësh ka goditur pjesë të Zvicrës

Sipas SED, gjatë 40 viteve të fundit, në Valais dhe në afërsi  të tij ka pasur 62 tërmete me një forcë prej 3 ose më shumë ballësh

Pasditen e të enjtes (sot) rreth orës 13.11 minuta është dridhur toka në disa regjione të Zvicrës. Sipas Shërbimit Sizmologjik Zviceran në ETH Cyrih (SED), tërmeti kishte një forcë prej 4.1 të shkallës Rihter.

Tronditja ishte veçanërisht e dukshme në Valis të Epërme, Berner Oberland si dhe Zvicrën Qendrore dhe Ticinon Veriore, raporton srf.ch. Dridhja e  parë e tokës ka ndodhur në thellësinë prej 7.1 kilometrash

Sipas njohurive të deritashme, tërmeti nuk ka shkaktuar dëme.

Një tronditje e mëtejme ka ndodhur rreth gjysmë ore më vonë në një thellësi prej 8.6 kilometrash, transmeton albinfo.ch

Kërcënimi më i madh, në Valis
Valisi është rajoni në Zvicër që goditet më shpesh nga tërmetet. Një tërmet me një forcë prej 2.8 të shkallës Rihter ka ndodhur në rajonin Sion në mes të majit.

Sipas SED, gjatë 40 viteve të fundit, në Valais dhe në afërsi  të tij ka pasur 62 tërmete me një forcë prej 3 ose më shumë ballësh, përcjell albinfo.ch. Gjashtë prej tyre kanë arritur forcën prej më shumë se 4 ballësh dhe janë perceptuar në një zonë më të gjerë.

Një tërmet prej 6 deri në 6.5 shkallësh ndodh në Valais mesatarisht çdo 100 vjet. Tërmeti i fundit i rëndë me dëmtime të mëdha në ndërtesa ka ndodhur para 75 vitesh në Valisin qendror dhe të poshtëm.

---