Thaçi e Bugajski, konferencë në Uashington për njohje të reja

Janusz Bugajski e ka vlerësuar lart përkushtimin institucional për tejkalimin e ngërçit politik dhe arritjen e konsensusit

Kryeministri Hashim Thaçi ka pritur drejtorin e Qendrës për Studime Strategjike dhe Ndërkombëtare, Janusz Bugajski. Në takim është diskutuar për zhvillimet aktuale politike në Kosovës dhe në rajon.

Kryeministri e informoi Bugajskin për konsolidimin e institucioneve të reja të vendit dhe për arritjen e marrëveshjes mes partive politike kosovare për zgjedhjen e presidentit dhe për reformën e domosdoshme të Ligjit zgjedhor, si dhe për reformën e zgjedhjes së presidentit drejtpërdrejt nga populli.

Në komunikatën për media të Kryeministrisë, thuhet se Thaçi theksoi se me këtë marrëveshje është krijuar një klimë pozitive për thellimin e mëtejshëm të reformave të gjithëmbarshme në politikë, ekonomi dhe legjislacion.

Janusz Bugajski e ka vlerësuar lart përkushtimin institucional për tejkalimin e ngërçit politik dhe arritjen e konsensusit midis partnerëve të koalicionit dhe me partinë kryesore opozitare për zgjedhjen e presidentes dhe për fillimin e reformës zgjedhore në Kosovë.

Thaçi e Bugajski janë dakorduar që në një të ardhme të afërt ta organizojnë një konferencë ndërkombëtare në Washington për rritjen e numrit të njohjeve të reja për shtetin e Kosovës.