Thaçi, BE-së: Mos e ulni nivelin e përfshirjes në dialog me emisar pa kredibilitet

(KEYSTONE/Cyril Zingaro)

Para Samitit të Zagrebit që do të mbahet në muajin maj në Kroaci, Bashkimi Evropian pritet të emërojë një Përfaqësues Special për dialogun Kosovë-Serbi. Një gjë të tillë e ka konfirmuar vetë Përfaqësuesi i Lartë i BE-së për Politikë të Jashtme dhe Siguri, spanjolli Josep Borell.

Një prej emrave më të përfolur për t’u marrë me dialogun Prishtinë-Beograd është ai i kryediplomatit Miroslav Lajcak.

Megjithatë, presidentit të Kosovës, Hashim Thaçi, nuk po i pëlqen fakti që BE-ja do të merret me dialogun me zyrtar të nivelit më të ulët.

Sipas tij, zgjedhja e një emisari pa besueshmëri nuk i ndihmon procesit dhe përpjekjeve për arritjen e një marrëveshjeje.

“Bashkimi Evropian duhet t’i japë peshë politike përfshirjes së vet në dialogun Kosovë-Serbi. Duke ulur nivelin dhe përgjegjësinë në një emisar pa kredibilitet nuk i ndihmon këtij qëllimi. BE-ja duhet t’i përkrahë të gjitha përpjekjet që çojnë kah arritja e marrëveshjes historike dhe të punojë me partnerë që japin rezultate”, ka shkruar Thaçi në Twitter, përcjell Albinfo.ch.