Thaçi telefonon Mustafën, i ofron përkrahje për shërim

Presidenti i Kosovës, Hashim Thaçi, është shprehur se ka biseduar përmes telefonit me kryetarin e LDK-së, Isa Mustafa, i cili është i shtrirë në spital, përcjell albinfo.ch.

Thaçi ka thënë se ka provuar ta vizitojë Mustafën në spital, por që procedurat e trajtimit të tij nuk kanë bërë të mundur një gjë të tillë.

“Që nga momenti i informimit për gjendjen shëndetësore të ish-kryeministrit Isa Mustafa vura kontakt me bashkëpunëtorët dhe familjarët e tij”, ka thënë Thaçi.

Presidenti i Kosovës ka shtuar se i ka ofruar përkrahje të plotë për shërim, kudo të jetë e nevojshme.

Mustafa pritet të dërgohet në Gjermani për analiza të mëtutjeshme. Ai ishte shtrirë në spitalin amerikan, siç thuhej për shkak të gripit, megjithatë, dyshohet se vuan nga një sëmundje më e rëndë.