Thirrja e ministrit: Mos i jepni para policisë serbe

“Bashkëqytetarët tanë duhet të ankohen për të gjitha. Edhe kur kanë pasur probleme me kompanitë ajrore, u kam kërkuar që të ankohen. Ne si shtet nuk mund të merremi me rastin pa u ankuar. Kam dëgjuar që ka raste kur deri në 100 euro kanë paguar për fletën e bardhë. Por, i lus që të lajmërohen”, ka thënë Murati

Kolonat e gjata me mërgimtarë janë bërë të zakonshme, sa herë ka festa, ose gjatë verës në kufirin ndërmjet Kosovës dhe Serbisë, raporton albinfo.ch.

Ministri i Diasporës, Valon Murati, ka bërë apel përmes një interviste “RTV Dukagjinit”, që bashkatdhetarët të cilëve u kërkohen para nga Policia serbe, ta raportojnë këtë gjë.

“Bashkëqytetarët tanë duhet të ankohen për të gjitha. Edhe kur kanë pasur probleme me kompanitë ajrore, u kam kërkuar që të ankohen. Ne si shtet nuk mund të merremi me rastin pa u ankuar. Kam dëgjuar që ka raste kur deri në 100 euro kanë paguar për fletën e bardhë. Por, i lus që të lajmërohen”, ka thënë Murati.

Ai gjithashtu ka akuzuar palën serbe se për faj të tyre po krijon kolonat e gjeta, derisa mërgimtarët maltretohen në mënyra të ndryshme për të vizituar familjet në Kosovë.

Gjithashtu, Ministri i Diasporës ka thënë se nuk kanë arritur të konfirmojnë se një mërgimtar ka vdekur gjatë pritjeve për të hyrë në Kosovë.