Thyhet rekordi, 1.9 milionë pasagjerë në aeroportin e Prishtinës

Aeroporti Ndërkombëtar i Prishtinës (ANP), “Adem Jashari” edhe këtë vit është përgatitur për pritjen e udhëtarëve që vijnë në Kosovë për festat e fundvitit.

Valentina Gara, zëdhënësja e Aeroportit Ndërkombëtar të Prishtinës është shprehur se, për këtë fund vit ka shtim të fluturimeve. “Ne kemi pasur më shumë fluturime për këtë vit. Në fund të vitit do të kemi 1.9 milionë pasagjerë”, theksoi Gara në televizionin publik të Kosovës.

Ajo bëri me dije se ky vit është më i suksesshëm që nga hapja e Aeroportit Ndërkombëtar të Prishtinës (ANP), përcjell albinfo.ch.

Ajo foli edhe për zgjatjen e zgjerimin e pistës. “Është një vendim i qëlluar nga Qeveria e Kosovës, ka pasur anulim të fluturimeve dhe është dashur që pasagjerët të aterojnë në Aeroportet fqinje në rast të motit të keq. Ne presim që pas fillimit të punimeve për 18 muaj të përfundojnë punimet”, deklaroi Gara.

“Ne si aeroport do të dyfishojmë fluturimet. E kemi Wizzair, Easyjet. Synojmë që të sjellim kompani sa më shumë që të kemi oferta më të mira”, theksoi ajo.