Topi dhe Krasniqi kërkojnë koordinim më të madh të Shqipërisë dhe Kosovës

Presidentin i Shqipërisë, Bamir Topi dhe ushtruesi i detyrës së presidentit të Kosovës, Jakup Krasniqi gjatë takimit të mbajtur sot në Tiranë kanë kërkuar koordinim dhe bashkëpunim më të madh të të dyja vendeve.

Sipas një njoftimi të Zyrës për informim të Presidencës, Topi dhe Krasniqi kanë biseduar për çështjen e bashkëpunimin midis dy vendeve, situatën politike respektive në të dy vendet, si dhe për çështjen e shumëfolur të raportit të Dick Martyt, i cili do të jetë objekt shqyrtimi në Asamblenë Parlamentare të Këshillit të Evropës.

Gjatë takimit presidenti Topi ka thënë se qëndrimi i shtetit shqiptar është i qartë. “Së pari ne inkurajojmë lidershipin politik të Kosovës, institucionet e Kosovës për konstituimin sa më të shpejt të institucioneve kushtetuese të Parlamentit, të Presidentit, të Qeverisë së Kosovës, për të vazhduar planin e rindërtimit të Kosovës së re, shtet i lirë sovran dhe i pavarur dhe për të ushtruar të gjitha mundësitë reale të bashkëpunimit në rajon, por edhe më gjerë…”.

Topi ka thënë tha se Shqipëria dhe Kosova janë kontribuues të rëndësishëm të paqes rajonale.

Nga ana tjetër Krasniqi ka theksuar se institucionet e dy vendeve respektive kanë nevojë për t’i koordinuar punët në shumë fusha të jetës, jo vetëm të bashkëpunimit të ndërsjellë, por bashkëpunim për të ngritur koordinimin mes vendeve të rajonit të Ballkanit dhe për të ngritur bashkëpunimin edhe në marrëdhëniet ndërkombëtare.

“Ne jemi të bindur, që raporti siç është raporti i raportuesit të Këshillit të Evropës, Dick Marty janë raporte të iniciuara nga qarqe që nuk ia duan të mirën Kosovës, shtetit të Kosovës, zhvillimit të demokracisë në Kosovë, por sipas gjitha gjasave qarqe të caktuara nuk ia duan të mirën as shqiptarëve në përgjithësi”, ka thënë Krasniqi.