Tragjedi në Bolonjë: Vdes 12-vjeçari shqiptar pas rënies nga kati i 8-të

Një ngjarje e rëndë tronditi mbrëmjen e djeshme qytetin e Bolonjës, ku një djalë 12-vjeçar me origjinë shqiptare humbi jetën pasi ra nga çatia e një ndërtese.

Incidenti ndodhi rreth orës 19:00 në Via Piave, kur sipas raportimeve paraprake, xhami mbi të cilin po ecte i mituri nuk mbajti peshën e tij dhe u thye, duke shkaktuar rënien fatale në shkallë, transmeton albinfo.ch.

Përpjekjet e shokëve që ndodheshin me të për ta ndihmuar rezultuan të pasuksesshme, pasi djali humbi jetën menjëherë në vendngjarje.

Ekipet e urgjencës mjekësore dhe forcat e policisë mbërritën menjëherë dhe nisën hetimet për të zbardhur rrethanat e ngjarjes. Hetimet mjeko-ligjore po fokusohen në oborrin e ndërtesës, ku përfshihen disa shkallë, si dhe në zonën ku ndodhi rënia tragjike./Albinfo.ch

---