Trump kritikon sërish Zvicrën

Trump rikthen kritikat ndaj Zvicrës dhe përmend deficitin tregtar

Presidenti amerikan Donald Trump ka përmendur edhe një herë Zvicrën si shembull për të justifikuar politikën e tij të tarifave doganore. Në një intervistë për “Fox Business”, ai deklaroi se mirëqenia e Zvicrës bazohet në faktin se Shtetet e Bashkuara janë “shfrytëzuar” në marrëdhëniet tregtare, përcjell albinfo.ch.

Edhe pse e përshkroi Zvicrën si një vend “ultra perfekt”, Trump theksoi se kjo, sipas tij, është e mundur vetëm sepse SHBA-të e lejojnë një gjë të tillë. Ai shtoi se ka edhe rreth 40 vende të tjera që përfitojnë në mënyrë të ngjashme, duke kritikuar sërish deficitin tregtar prej 40 miliardë dollarësh.

Trump u rikthye gjithashtu te biseda telefonike e verës së kaluar me presidenten e atëhershme të Zvicrës, Karin Keller-Sutter, duke thënë se mendonte se kishte folur me “kryeministren”. Ai e përshkroi bisedën si të përsëritur, duke theksuar se Keller-Sutter i kishte kujtuar vazhdimisht se Zvicra është një vend i vogël. “Nuk po arrija ta mbyllja telefonatën,” tha Trump, duke shtuar se në vend të një uljeje, tarifat e importit u rritën në 39 për qind.

Në të njëjtën intervistë, Trump deklaroi se shumë kompani që nuk donin të paguanin tarifat doganore kanë zhvendosur prodhimin e tyre në SHBA. Në këtë kontekst, edhe disa gjigantë zviceranë si Roche dhe Novartis kanë njoftuar plane për investime miliardëshe në fabrika të reja në Shtetet e Bashkuara.

Këto investime janë pjesë e një marrëveshjeje për tarifat e arritur në muajin nëntor me administratën Trump, e cila parashikon investime në vlerë prej 200 miliardë dollarësh nga kompani zvicerane në SHBA. Në këmbim, tarifat doganore amerikane për shumë produkte zvicerane pritet të ulen nga 39 në 15 për qind.

Gjatë fjalimit të tij në Forumin Ekonomik Botëror në Davos, Trump deklaroi se kishte ulur tarifat për të mos dëmtuar qytetarët zviceranë. Ndërkohë, Departamenti Federal i Financave i Zvicrës, nën drejtimin e Karin Keller-Sutter, theksoi se beson që popullsia zvicerane do ta interpretojë saktë këtë deklaratë.

---