Ushtarët me prejardhje të huaj, më të përkushtuar se vendësit

Studimi më i ri i realizuar nga ETH konstaton se secondot, sipas rregullit janë më të përkushtuar ndaj shërbimit ushtarak se sa zviceranët “e vërtetë"

Një studim i realizuar nga Universiteti ETH i Cyrihut  ka ardhur në konstatimin se “secondot” (të huajt e gjeneratës së dytë) jo vetëm që janë të denjë për tu pranuar në ushtrinë e Zvicrës por edhe janë ushtarë më të mirë se vetë zviceranët “me rrënjë”. Ky studim, siç vërejnë gazeta të ndryshme të Zvicrës bie ndesh me qëndrimin e përhapur në opinion sipas të cilit të huajt nuk e meritojnë besimin për të shërbyer në ushtri.

Gazetat si “Tages Anzeiger”, “Neue Luzerner Zeitung”, “Aargauer Zeitung” etj. në botimet e tyre online merren me këtë çështje. Ushtria nuk ofron të dhëna në lidhje me prejardhjen etnike të ushtarëve. “Zvicerani është zviceran” thonë burimet nga forcat e armatosura të Zvicrës, duke iu referuar shtetësisë zvicerane që duhet të kenë si kusht kryesor rekrutët ushtarakë.

Ndërsa një studim i kryer vitin e kaluar ka konstatuar se një pjesë e madhe e zviceranëve të anketuar kanë dilema në lojalitetin e ushtarëve me prejardhje të huaj. 29% mendojnë se vetëm ushtarët me prejardhje zvicerane janë të gatshëm të mbrojnë vendin ndërsa 13 për qind të tyre konsiderojnë madje se shtetasve zviceranëve prejardhje të huaj nuk u duhet lejuar fare shërbimi ushtarak.

Ndërkaq studimi më i ri i realizuar nga hulumtues të Akademisë Ushtarake brenda ETH-së (Milak) konstaton se secondot, sipas rregullit janë më të përkushtuar ndaj shërbimit ushtarak se sa zviceranët “e vërtetë”. 60.2% e secondove që shërbejnë në ushtri thonë se gatishmëria e tyre për të shërbyer në këtë ushtri është “e lartë”. Kjo përqindje te zviceranët pa prejardhje të huaj është 57.8%, ose diçka rreth 2% më e ulët.

Për të sqaruar arsen e motivimit më të madh të secondove për shërbimin ushtarak në ushtrinë e Zvicrës, tagesanzeiger.ch ka marrë edhe mendimin e Bashkim Isenit, politolog dhe drejtor i portalit albinfo.ch. “Disa të rinj me prejardhje të huaj e kanë për krenari të bartin uniformën zvicerane. Varet edhe nga ajo se prej nga vjen ushtari i caktuar, por shumë prej tyre e shohin si “pjesë të rëndësishme të integrimit të tyre”, faktin që janë pjesë e një institucioni shtetformues, siç është ushtria”, thotë Iseni.

Megjithëkëtë, shkruan gazeta, duke cituar njërin ndër autorët e studimit, Tibor Szvircsev Tresch, heterogjeniteti nacional në ushtri nuk është gjithmonë pa probleme. Sipas tij është veçanërisht problematike kur një numër i madh i pjesëtarëve të një etnie caktohen në grup të njëjtë. “Kjo gjë përbën rrezik për dieferencimin e tyre”.

Bashkautore e studimit, krahas dr. Tresch është studiuesja shqiptare në Akademinë Ushtarake të ETH Zürich, (lic. phil. Dozentur Militärsoziologie) Evgjenije Sokoli.

/albinfo.ch/