3 muaj pas lëndimit, Valdet Rama kthehet në fushë

Skuadra gjermane 1860 München mund të marrë frymë më lirshëm. Një nga teknikët më të mirë të këtij ekipi, Valdet Rama pas një lëndimi të pësuar që nga shtatori, të martën i është kthyer trajnimit të plotë. Kjo është konfirmuar edhe nga faqja zyrtare e klubit, shkruan abendzeitung –münchen.de.

Futbollisti shqiptar ka kaluar një nga periudhat më të vështira të karrierës, pasi ndërrimi i skuadrës dhe kalimi në bundesligën e dytë gjermane nuk ishte ndër më shpërthyesit për mesfushorin. Kjo, për shkak të dëmtimeve radhazi të cilat e kanë penguar atë që të japë maksimumin për ekipin. Tani ai është kthyer sërish për të ndihmuar skuadrën e tij në ndeshjet para përfundimit të sezonit dimëror dhe për t’i shpëtuar rënies një kategori më poshtë, njofton albinfo.ch

Rikthimi në fushë i 28 vjeçarit Rama është edhe një shpresë më shumë për kombëtaren shqiptare dhe trajnerin Gianni De Biasi. Por Valdeti duhet të punojë shumë për të gjetur formën e tij nëse dëshiron të jetë pjesë e stafit të kombëtares shqiptare që do të udhëtojë vitin e ardhshëm për në Kampionatin Evropian.