Veljanovski: Serbia të bëhet faktor paqeje e stabiliteti në rajon

Serbia duhet ta njoh realitetin e ri në Kosovë, ka thënë të martën në Prishtinë, kryetari i Kuvendit të Maqedonisë Trajko Veljanovski

Pas takimit me homologun e tij kosovar, Jakup Krasniqi, Veljanovski ka theksuar nevojen e thellimit të bashkëpunimit në mes Kosovës dhe shtetit të tij.

Ndërkaq, kryeparlamentari Krasniqi shprehu falënderimin e tij për vizitën e homologut maqedonas në Kosovë, duke thënë se në të ardhmen do të ketë edhe takime tjera për të thelluar bashkëpunimin ndërshtetëror.

Janë vlerësuar marrëdhëniet ndërmjet dy vendeve si shumë të mira edhe në interes të stabilizimit të rajonit, në takimin tjetër me presidente e Republikës së Kosovës, Atifete Jahjaga.

“Republika e Kosovës dhe Republika e Maqedonisë duhet të ta ndihmojnë njëra-tjetrën në rrugën e integrimeve euroatlantike, sepse kjo është e ardhmja e përbashkët”, tha Jahjaga.

Ndërkaq, kryetari i Kuvendit të Maqedonisë, Trajko Veljanovski tha se Maqedonia dhe Kosova nuk kanë asnjë çështje të hapur mes vete dhe se duhet të thellohet bashkëpunimi në të gjitha fushat përfshirë atë të ekonomisë dhe të infrastrukturës.

Veljanovski tha se është në interes të të gjitha vendeve të Ballkanit përshpejtimi i procesit të integrimit në strukturat euroatlantike dhe se është i nevojshëm bashkëpunimi ndërmjet tyre.

Edhe kryeministri i Qeverisë së Republikës së Kosovës, Hashim Thaçi ka pritur në takim kryetarin e Kuvendit të Republikës së Maqedonisë, Trajko Veljanovski, me të cilin ka biseduar për marrëdhëniet midis dy vendeve dhe zhvillimet aktuale në rajon. 

Kjo është vizita e parë zyrtare e kryetarit të Parlamentit të Maqedonisë në shtetin e Kosovës.