Vetëm 1800 mërgimtarë regjistrohen për zgjedhje!

Rreth 1800 mërgimtarë kanë marrë të drejtën për të votuar në zgjedhjet lokale të 3 nëntorit në Kosovës. Sipas KQZ-së, diaspora është e pa interesuar për zgjedhje

Vetëm 2150 kosovarë që jetojnë jashtë vendit kanë aplikuar për votime në zgjedhjet e 3 nëntorit, ndërsa pas verifikimit të kërkesave, Komisioni Qendror Zgjedhor (KQZ) ka certifikuar vetëm 1800 prej tyre. Kjo shifër dëshmon se diaspora nuk ka interesim për zgjedhje lokale. 　

Kryeshefi i sekretariatit të KQZ-se, Enis Halimi, ka thënë se KQZ-ja ka bërë fushatë për sensibilizimin e bashkatdhetarëve që jetojnë në diasporë, lidhur me të drejtën e tyre për të votuar në zgjedhjet e nëntorit 2013. Sipas tij, fushata ka ngërthyer në vete publikime në media elektronike dhe të shkruara.

“Ministria e Diasporës ka bërë kërkesë 2 herë në KQZ që të zgjatet afati i regjistrimit për votim jashtë Kosovës, e cila i është miratuar”, ka thënë ai, raporton “Zëri”.

Edhe anëtari i KQZ-së nga LDK-ja, Florian Dushi, ka thënë se edhe në këto zgjedhje, sikur edhe në zgjedhjet paraprake, numri i shtetasve të Kosovës që jetojnë në mërgim e që kanë aplikuar për t’u regjistruar si votues përmes postës është tejet i vogël.

“KQZ vazhdimisht angazhohet që përmes fushatës së informimit publik, një fushatë e cila është mjaft e kushtueshme, t’i informojë shtetasit tanë në mërgim, por edhe t’i joshë ata që të marrin pjesë në numër sa më të madh në zgjedhje. Nisur nga ky fakt, konsideroj se arsyeja kryesore e një pjesëmarrjeje kaq të ulët ne zgjedhje është procedura mjaft e komplikuar ligjore e votimit përmes postes”, ka thënë ai.

Sipas tij, për këtë arsye institucionet përgjegjëse në vend, duhet që në të ardhmen të mendojnë dhe t’i bëjnë ndryshimet e nevojshme, të cilat do t’u mundësonin shtetasve kosovarë që jetojnë jashtë vendit një procedurë më të lehtë të votimit.

Edhe anëtari i KQZ-së nga Lëvizja “Vetëvendosje”, Adnan Rrustemi, thotë se pjesëmarrja e ulët e diasporës është pasojë e mungesës së informimit publik mbi afatet dhe mënyrën e regjistrimit.

“Për zgjedhjet e 3 nëntorit, edhe pse është planifikuar, KQZ-ja, duke u fokusuar në përmbushjen e synimeve për të regjistruar mbi 40 mijë serbë nga Serbia, nuk ka realizuar asnjë aktivitet informues për votuesit jashtë vendit, pothuajse këta 1500 sa kanë aplikuar janë informuar individualisht dhe nga familjarët e tyre”, konsideron ai.