Vizita e kryeministrit kinez, me fokus në ekonomi

Zvicra do të jetë shteti i parë i Evropës kontinentale si dhe shteti i parë ndër 20 fuqitë më të mëdha ekonomike të botës, që lidhin një marrëveshje për tregtinë e lirë

Kryeministri i Kinës, Li Keqiang ka ardhur në mbrëmjen e të enjtes për një vizitë dyditëshe nhë Zvicër siç bën të ditur Departamenti i Punëve të Jashtme, atë në Aeroportin e Cyrihut e ka pritur ministri i punëve të jashtme i Zvicrës, Didier Burkhalter. 

Me fjalët në gjuhën kineze „nin hao“ (mirë mbrëma) i është drejtuar mikpritësi mysafirit të lartë nga Kina, duke i uruar mirëseardhje në emrin e institucioneve të Zvicrës.

Në programin e sotëm të vizitës së kryeministrit kinez dhe të delegacionit të tij janë takimet me ministrin e jashtëm Burkhalter, presidentin e vendit, Ueli Maurer dhe ministrin e ekonomisë, Johan Schneider-Ammann. Me këtë të fundit, kryeministri Li pritet të nënshkruajë një marrëveshje mbi tregtinë e lirë.

Në një shkrim të publikuar në „Neue Zürcher Zeitung“, kryeministri kinez ka shkruar se marrëveshja mbi tregtinë e lirë me Zvicrën po finalizohet pas një periudhe negociatash që ka zgjatur tre vjet. Me këtë hap, Zvicra do të jetë shteti i parë i Evropës kontinentale si dhe shteti i parë ndër 20 fuqitë më të mëdha ekonomike të botës, që lidhin një marrëveshje për tregtinë e lirë, që për Kinën ka një rëndësi të jashtëzakonshme.

Zvicra do të jetë vendi i dytë evropian me të cilin Kina nënshkruan një marrëveshje të tillë. Në Kinë ekonomia zvicerane gëzon reputacion të lartë dhe Zvicra është ndër eksportuesit më të mëdhenj atje.

Siç bën të ditur departamenti i jashtëm më tutje, ministrat do të bisedojnë edhe për tema tjera bilaterale dhe ndërkombëtare. Situata në gadishullin korean dhe në Lindjen e Afërt do të jetë po ashtu temë bisedimi në mes të dy palëve.

Kjo është vizita e parë që Li Keqiang  po e bën në Evropë, që nga marrja e postit të kryeministrit, në muajin mars të këtij viti.

Pas Zvicrës, ai do të shkojë për vizitë në Gjermani.