“Vullkani” shqiptar në Zvicër

Talenti më i madh i boksit profesionist në Zvicër, shqiptari Faton Vukshinaj, fitoi ndeshjen e gjashtë radhazi në Grand Casino të Bazelit, duke u konfirmuar si një boksier mjaft premtues

Në Zvicër ka shumë kampionë shqiptarë të boksit. Nuk është vetëm Nuri Seferi, Arnold Gjergjaj dhe Xhavit Bajrami. Tani po lind edhe një yll i ri.

Talenti më i madh i boksit profesionist në Zvicër, shqiptari Faton Vukshinaj, fitoi ndeshjen e gjashtë radhazi në Grand Casino të Bazelit, duke u konfirmuar si një boksier mjaft premtues, shkruajnë mediat shqiptare.

“Vullkani” (nofka e boksierit shqiptar) triumfoi në ring ndaj një kundërshtari me shumë përvojë, sikurse është Nodar Robakidze (51 duele si boksier profesionist), dhe arriti ta mposhtte bindshëm me pikë në një duel me tetë raunde, përcjell albinfo.ch.

Kundërshtari nga Gjeorgjia, Nodar Robakidze, ishte shumë i kujdesshëm dhe nuk ofronte hapësira për godite, por Vukshinaj megjithatë ishte dominues në çdo raund dhe e ngriti intensitetin e dyluftimit nga njëri raund në tjetrin, duke e fituar kështu secilin nga 8 raundet, gjë që në fund e vulosën edhe 3 gjyqtarët zyrtarë, duke i dhënë fitoren e merituar boksierit me prejardhje nga Prizreni, i cili ka i lindur dhe jeton në Bazel të Zvicrës.