Xhaka mirëpret transferimin e Mkhitaryanit tek Arsenali

Granit Xhaka pret që Henrikh Mkhitaryan të ketë sukses te Arsenali, sapo të arrihet kalimi i tij në Londër, si zëvendësues i Alexis Sanchezit që do të kalojë te Manchester Unitedi.

Mkhitaryan ka pasur probleme në sezonin e fundit tek “Djajtë e Kuq”, ndërsa Xhaka, që e njeh nga ndeshjet në Bundesligë, thotë se armeni ka aftësi të mjaftueshme për të shkëlqyer tek Arsenali, transmeton Albinfo.ch.

“Kam lexuar se më 2009 ai kishte thënë se i pëlqen Arsenali. Jam i sigurt se stili i tij i lojës do të na përshtatej. Çdo lojtar ka kualitetet e tij. Ai është futbollist i shkëlqyeshëm, andaj vetëm të presim e të shohim çfarë po ndodh. Ishte e vështirë të luaja kundër tij. Të jem i sinqertë, më me qejf do të luaja krah tij. Ai është lojtar shumë i zoti dhe ka kualitete të shumta”, ka thënë Xhaka, raporton “DailyMail”.

Xhaka shkëlqeu në paraqitjen e fundit për Arsenalin në fitoren 4 me 1 ndaj Crystal Palacet. Ai asistoi në golin e parë, ndërsa ishte i përfshirë edhe në gola të tjerë.