Xhemaili dhe Bologna po shkëlqejnë

Bologna ka shënuar fitoren e dytë në tri ndeshjet e para të Serie A, kurse mesfushori shqiptar, Blerim Xhemaili ka qenë titullar

Përfaqësuesi i Zvicrës, shqiptari Blerim Xhemaili, me ekipin e Bolognas arkëtuan tri pikë të mëdha në Serie A. Bologna me rezultat 2:1 e mposhti Cagliari-n, në ndeshjen e javës së tretë, shkruan albinfo.ch.

Xhemaili luajti tërë takimin, bëri lojë të mirë, megjithatë u ndëshkua me karton të verdhë në minutën e 93-të. Bologna ngjitet në vend të pestë me gjashtë pikë, kurse Cagliari klasifikohet i 16-ti me një pikë.

Futbollisti nga Kosova, Përparim Hetemaj, luajti titullar për Chievon, por nuk arritën me shumë se një pikë me Lazion, e cila përfundoi me rezultat 1:1, në ndeshjen e javës së tretë në Serie A.

Për Chievon shënoi Gamberini në minutën e 52-të dhe pas tre minutave De Vrihj barazoi 1:1. Hetemaj tregoi angazhim të madh, ndërsa u ndëshkua me karton të verdhë në minutën e 54-të. Chievo renditet në vend të nëntë me katër pikël, sa ka edhe Lazio një pozitë më poshtë.