Zbatimi i iniciativës kundër migrimit masiv, jo para tri viteve

Grupet e përfaqësuara në parlament i kanë drejtuar qeverisë së vendit pyetje lidhur me orarin e parashikuar për zbatimin e iniciativës

Deri në jetësimin e plotë të iniciativës kundër migrimit masiv duket se do te kalojnë së paku tri vite. Një afat trevjeçar për këtë destinim e ka përmendur sot ministrja e drejtësisë, Simonetta Sommaruga  në kuadër të debatit që është zhvilluar sot në Dhomën Nacionale të Parlamentit të Zvicrës.

Parlamentarët kanë debatuar në lidhje me zbatimin e iniciativës me  ç`rast kanë marrë ne shqyrtim një numër interpelacionesh urgjente lidhur me këtë temë.

Debati është kërkuar nga grupet parlamentare të SVP/UDC-së, SP/PS-së, CVP/PDC-së dhe të të gjelbërve. Përfaqësuesit e këtyre grupeve të përfaqësuara në parlament i kanë drejtuar qeverisë së vendit pyetje lidhur me orarin e parashikuar për zbatimin e iniciativës.

Duke u përgjigjur, ministrja Sommaruga ka bërë të qartë se në dispozicion për vënien në jetë të iniciativës janë tri vite. Ndërkaq, sipas saj, një koncept rreth kësaj duhet të përpunohet deri në verën që vjen.