Zëvendëskryeministri Bislimi emëron këshilltar nga Lugina e Preshevës

Pas kryeministrit Albin Kurti, edhe zëvendësi i tij, Besnik Bislimi ka emëruar një këshilltar nga Lugina e Preshevës.

Bislimi ka emëruar në pozitën e këshilltarit politik, Ragmi Mustafin, i cili më herët ka bartur pozitën e kryetarit të Këshillit Kombëtar Shqiptar në Luginën e Preshevës, raporton Albinfo.ch.

Për emërimin ka njoftuar vetë Mustafi në një postim në Facebook.

“Me mirënjohje, dua të njoftoj se sot kam pranuar pozitën e Këshilltarit Politik të Zëvendëskryeministrit të parë për Integrim Evropian, Zhvillim dhe Dialog në Qeverinë e Republikës së Kosovës – Besnik Bislimi”, ka shkruar ai.

Tutje ai ka theksuar se kjo është mundësi e mirë për t’i shërbyer Kosovës dhe Luginës.

“Kjo mundësi e jashtëzakonshme për të shërbyer Kosovën dhe Luginën në kuadër të ekipit z. Bislimi edhe njëherë rikonfirmon përkushtimin e Qeverisë së Republikës të Kosovës ndaj shqiptarëve në Preshevë, Bujanoc dhe Medvegjë”, ka shkruar Mustafi.

Kohë më parë, kryeministri Albin Kurti emëroi Ardita Sinanin, ish kryetare e Preshevës, këshilltare politike për Preshevë, Medvegjë dhe Bujanoc./Albinfo.ch/