Zëvendësministri Selimi, në “target” të Vetëvendosjes

Petrit Selimi u gjuajt me vezë nga afërsia nga aktivistët e Lëvizjes Vetëvendosje derisa po dilte nga një lokal afër Qeverisë

Zëvendësministri i Punëve të Jashtme, Petrit Selimi është viktima tjetër e aktivistëve të Lëvizjes Vetëvendosje. Selimi u gjuajt me vezë nga afërsia nga aktivistët e kësaj lëvizje derisa po dilte nga një lokal afër qeverisë. Ai ishte i shoqëruar edh nga disa bashkëpunëtor të tij.

Aktin e sulmit e mori përsipër menjëherë Lëvizja Vetëvendosje e cila kohëve të fundit ka shpeshtuar sulmin ndaj liderëve institucionalë me vezë, ngjyrë dhe gjësende të tjera. Deri më tani në shënjestër ka qenë vetëm kryeministri Isa Mustafa dhe shoqëruesit e tij.

“Asnjëri nga eksponetët e kësaj Qeverie nuk do të mund të vazhdojë punën normalisht, pa u tërhequr marrëveshjet me Serbinë dhe demarkacioni me Malin e Zi. Nuk ka kuptim që pushteti të zhvillojë jetë normale dhe të rehatshme derisa shteti po shitet e defunksionalizohet dhe qytetarët po varfërohen”, thuhet në reagimin e Vetëvendosjes.

“Petrit Selimi njihet për miqësinë e tij me Ivica Daçiq-in, personin që Kosovën e quajti ISIS. Petrit Selimi dhe as shefat e tij asnjëherë nuk reaguan për këtë deklaratë të mikut të tyre Daçiq. Ai dhe shefat e tij, nuk do ta kenë funksionimin e lehtë nëse nuk tërhiqen”, thuhet në reagimin e LVV-së.