Zvicër: “Zhduken” 60 për qind e azilkërkuesve!

Në mes të qershorit dhe gushtit mesatarisht deri në 60 për qind të personave që kanë kërkuar azil në Zvicër ose kanë dashur të kërkojnë, janë zhdukur. Plus 20% këtë e kanë bërë pas paraqitjes së kërkesës.

Një dukuri e re, shqetësuese po regjistrohet muajve të fundit në qendrat e azilit në Zvicër: “zhdukja” e azilkërkuesve. Në mes të qershorit dhe gushtit mesatarisht deri në 60 për qind të personave që kanë kërkuar azil në Zvicër ose kanë dashur të kërkojnë, janë zhdukur, ka thënë Mario Gattiker, shef i Sekretariatit Shtetëror për Migracion (SEM). Ai këtë zhvillim e cilëson si një “dukuri të re”.

“Njerëzit në fjalë deklarojnë se duan të paraqesin kërkesë për azil, por udhëtojnë pastaj, e lëshojnë Zvicrën para intervistës së parë”, thotë Gattiker në intervistat që ai ka dhënë sot për një numër gazetash zvicerane.

Nga qershori deri në gusht, janë zhdukur deri në 40 për qind të atyre refugjatëve që janë shprehur se do të kërkonin azil. Zhdukja ka ndodhur para se të bëhet sistemimi i plotë i kërkesës së tyre për azil. Kësaj i shtohen edhe 20 për qind të tjerë të cilët, pas kërkesës së bërë për azil kanë lëshuar Zvicrën në mënyrë të parregullt. Ata, sipas sekretarit Gattiker, kanë vazhduar rrugën në drejtim të veriut.